579. [Vers. 18.] "A tribus his occisa est tertia pars hominum, ex igne et ex fumo et ex sulphure exeunte ex oribus illorum." - Quod significet quod omnis intellectus veri et inde vita spiritualis ex illis exstincta sit, constat ex significatione "tertiae partis hominum," quod sit omnis intelligentia seu intellectus veri, et quia inde est vita spiritualis, ideo etiam haec involvitur; ex significatione "occidi," quod sit exstingui, nam cum intellectus veri exstinguitur, homo spiritualiter occiditur (videatur supra, n. 315 [a, b]): (quod "tertia pars," cum de veris, sit omne, [supra] n. 506; et quod homo sit intellectus veri et perceptio boni, n. 280, {1}546;) et ex significatione "ignis, fumi et sulphuris exeuntium ex oribus illorum," quod sint cogitata et inde ratiocinia scaturientia ex amore mali, ex amore falsi, et ex concupiscentia destruendi vera et bona per falsa mali (de qua mox supra, n. 578): ex his videri potest quid per illa verba significatur. Haec dicuntur de "equis" in visione visis, quod nempe "ex illorum oribus exiverit ignis, fumus et sulphur;" et quia per "equos" in visione visos significantur falsificationes Verbi per ratiocinia ex fallaciis, patet quod per "ignem, fumum et sulphur " significentur illa quae causantur, quae sunt amores mali et falsi ac concupiscentiae destruendi vera et bona ecclesiae; et hoc fit per cogitata et ratiocinia ex fallaciis de sensu et intellectu Verbi: quando enim homo non cogitat nisi ex fallaciis, cogitat solum ex illis quae in sensu litterae ad primum visum exstant, et non ex aliquo sensu litterali interiori: inde admodum crassas et duras ideas de omni doctrinali, quod ex Verbo, captat; sicut de Deo, quod irascatur, puniat, in infernum conjiciat, tentet, quod Ipsum paeniteat, et plura similia, praeter quod corporee et materialiter de singulis quae in Verbo legit, et nihil spiritualiter, cogitet; inde est quod mere sensualiter; et cum mere sensualiter, tunc solum ex amore sui et mundi; et cum ex his, solum ex malis et falsis. Quare cum sibi relictus ex suo spiritu cogitat, tunc ex illorum amorum affectione cogitat, quos illis quae in Verbo sunt conjungit; et cum Divina Verbi conjunguntur talibus, tunc adulterantur et falsificantur omnia quae ibi; nam Divina Verbi nusquam conjungi possunt quam cum amore caelesti seu cum affectione spirituali; si cum alio amore, seu cum alia affectione, tunc clauditur mens superior, quae vocatur mens spiritualis, et modo aperitur mens inferior, quae vocatur mens naturalis; immo apud illos qui conjungunt Verbi vera cum affectione amoris sui, clauditur etiam mens naturalis, et aperitur modo ultimum hujus mentis, quod vocatur sensuale, quod proxime inhaeret corpori, et proxime exstat mundo; inde est quod spiritus hominis fiat corporeus, qui nullam sortem habere potest cum angelis, qui sunt spirituales.