914. Vers. 18, 19. Et exivit Noah, et filii ejus, et uxor ejus, et uxores filiorum ejus cum illo. Omnis fera, omne reptile, et omnis avis, omne repens super terra; secundum familias suas exiverunt de arca. 'Exivit' significat quod factus: per 'Noahum et filios ejus' significatur homo Antiquae Ecclesiae: per 'uxorem ejus et uxores filiorum ejus cum illo' significatur ipsa Ecclesia: 'omnis fera et omne reptile' significant bona ejus; 'fera' bona interni hominis, 'reptile' bona externi: 'et omnis avis, omne repens super terra,' significant vera: 'avis' vera interni hominis, 'repens super terra' vera externi: 'secundum familias suas' significant paria: 'exiverunt de arca' significant, ut prius, ita facta; et simul statum libertatis.