2908. `Mortua est Sarah': quod significet noctem quoad vera fidei, constat a significatione `mori, mortui ac mortis' cum praedicantur de Ecclesia, quod sit ultimum ejus tempus cum omnis fides, hoc est, charitas exspiravit; quod tempus in Verbo passim vocatur `nox,' n. 221, 709, 1712, 2353; quod `mori' sit quod tale esse desinat, videatur n. 494; et ex repraesentatione `Sarae' quod sit verum Divinum, de qua supra n. 2904; inde patet quod illa significentur.