2972. `Et omnis arbor quae in agro': quod significet cognitiones Ecclesiae interiores, constat a significatione `arboris' quod sint perceptiones cum agitur de Ecclesia caelesti, de qua n. 103, 2163, at cognitiones cum agitur de Ecclesia spirituali, de qua n. 2722; hic cognitiones interiores quia dicitur `omnis arbor quae in agro,' et sequitur `quae in omni termino ejus circumcirca' per quae significantur cognitiones exteriores; et a significatione `agri' quod sit Ecclesia, de qua prius. De arbore quae in agro et in terminis ejus circumcirca memoratur propter sensum illum internum, alioquin non memoratu digna in Verbo quod Divinum.