De coelo apud hominem
Communicatio coeli cum homine est mirabilis, et nisi instructus a Domino, nusquam potest sciri, nec si scitur, credi; raro est influxus talis, ut cadat in manifestam cogitationem, hoc enim a spiritibus qui prope hominem sunt, venit, sed influxus est talis, apud hominem sunt talia quae credit, et quibus ex corde afficitur, quando angeli qui apud illum, in talibus sunt, et de illis inter se loquuntur, tunc influit apud hominem animi hilaritas, contentum, et quies, cum autem talia non sint in fide et affectione hominis, tunc influit tristitia, et inquietudo, ac similia; et hoc non aliter cadit in hominis cogitationem, qui tunc potest, de prorsus alia re cogitare: de hoc per multam experientiam sum tandem instructus, non enim scivi unde tristitia, et unde hilaritudo animi, cum non cogitarem nec loquerer de talibus quae causantur, at tunc percepi quod inde causa.
