5502. Primum inferna ex illis gentibus translata sunt, quae ad meridiem et ad orientem, inferna magica ad meridiem, et phantastica ad orientem; et illi qui ibi ingenti numero conjecti sunt in mare occidentale, et in voraginem occidentalem versus septentrionem; quod ita factum: omnes qui in infernis magicis ad meridiem inde eximebantur, et conjiciebantur in mare occidentale, a parte ejus meridionali, secundum omne litus ejus, ad multam extensionem versus occidentem, nam extenditur id mare ad occidentem in longitudine, latitudo non est magna; et postea magica eorum in pulverem redacta dissipabantur et sternebantur super mare, qui pulvis apparebat sicut paleae. Postea eximebantur illi qui in infernis phantasticis ad orientem, etiam ad distantiam paene similem a medio, et illi qui ibi deducebantur via septentrionis ad occidentem, et pars eorum conjecti sunt in voraginem occidentalem ibi versus septentrionem, et pars in mare occidentale ad litus spectans septentrionem, etiam longa serie, et ingenti numero.